Fyrst og fremst samstarva ergoterapeutar við tey, sum hava tørv á ergoterapi, og teirra avvarðandi.
Ergoterapeutar samstarva harumframt við aðrar fakbólkar so sum fysioterapeutar, læknar, sosialráðgevar, námsfrøðingar og røktarstarvsfólk.
Ergoterapeutar kunnu arbeiða við at fremja heilsu við at gera tað møguligt hjá øllum borgarum at hava eitt virkið lív. Tá arbeiða ergoterapeutar m.a. við hjálpartólum, atkomuviðurskiftum, á endurútbúgvingar- og arbeiðsumhvørvis økjum, á stovnum, búðstovnum og privatum virkjum.
Ergoterapeutar kunnu arbeiða við børnum og ungum á dagstovnum, skúlum, fríðtíðarskúlum, serskúlum- og stovnum, í barna- og ungdómspsykiatri og annars í nærumhvørvium hjá barninum.
Ergoterapeutar kunnu arbeiða við eldri í egnum heimi og nærumhvørvi, á uppvenjingar- og virkishúsum, dagtilhaldum og røktarheimum. Ergoterapeutar kunnu eisini arbeiða við eldri á sjúkrahúsum og á sereindum fyri dement.
Ergoterapeutar kunnu arbeiða við fólkum, sum hava sálarligar trupulleikar, í heimi, nærumhvørvi og á arbeiðsplássum teirra; á psykiatriskum sjúkrahúsum og í økis- og sosialpsykiatriini.
Ergoterapeutar kunnu arbeiða við fólkum, sum hava likamligar trupulleikar, likamlig brek og sjúkur. Arbeitt verður í egnum heimi, nærumhvørvi og á arbeiðsplássum teirra; á rehabiliteringsmiðstøðum og á sjúkrahúsum.
Ergoterapeutar kunnu arbeiða við heilsu og fyribyrging á arbeiðsplássum m.a. innan arbeiðseftirlit og sum ráðgeving.
Ergoterapeutar arbeiða við fyribyrgjan av sjúku og við heilsufremjan á samfelags-, bólka- og einstaklinga støði.
© 2019 Ergoterapeutfelagið. 